ප්‍රීතියක දී අප සතුටු කඳුළු හෙළනවා. එහෙත් මනුෂ්‍ය අප පමණක් නො ව අපගේ සත්ත්ව මිතුරා වන බල්ලා පවා සතුටු කඳුළු හෙළනා බව නවතම අධ්‍යයනයක් පෙන්වා දෙනවා. මේ අධ්‍යයනය මෙහෙයවා ඇත්තේ ජපානයේ Azabu විශ්වවිද්‍යාලයයේ Takefumi Kikusui විසිනුයි. මීට අදාළ
නිබන්ධය අගෝස්තු 25 Current Biology ජර්නලයේ පළ වනවා. තම අධ්‍යයනය සඳහා පර්යේෂකයා බල්ලන් 18 දෙනකු යොදාගත්තා. එහි දී ඔවුන් සොයාගත් තවත් දෙයක් නම් බල්ලන් මෙලෙස සුලබ සතුටු කඳුළු වගුරන්නේ ස්වාමියා පිටත ගොස් (හෝ වෙන් ව) යළි පැමිණි විට බවයි. මෙහි දී අධ්‍යයනයට ගත් නියැදිය සමන්විත වූවේ වැඩට යන විට ගෙදර නවත්වන්නේ නැති ව දිවා සුරැකුම් වාසස්ථානවල රඳවා යන බලු නියැදියක්. මේ බලු සුරතලුන් ස්වාමියා තමාව දිවා සුරැකුමේ දමා යන විටත් ස්වාමියන් යළි එන විටත් හඬන බව පෙනුණා. මේ කඳුළු පරිමා මනින ලද විට පෙනී ගියේ ස්වාමියා යළි එන විට හෙළන සතුටු කඳුළු පරිමා අධික බවයි. එසේ කඳුළු හෙළුව ද ඒ කඳුළු සතුටු කඳුළු බව පෙනී ගියේ ප්‍රීතිදායක බිරීම් සමග රැඟුම් දක්වමින් බල්ලා සතුට පළ කළ නිසයි. සතුටු කඳුළුවලට අදාළ ව වාර්තා වූ ප්‍රයිමෙටා නො වන ප්‍රථම උදාහරණය මෙය බව පර්යේෂකයන් පෙන්වා දෙනවා. දුකක දී බල්ලන් කඳුළු වගුරුවන බව නම් මීට පෙර අධ්‍යයනය මඟින් හෙළි කර තිබෙනවා. ස්වාමියා දමා යෑම, මස් කටු හෝ ප්‍රිය කරන කෑම තමා බලා සිටිය දී වෙන සතුන්ට දීම වැනි අවස්ථාවල බල්ලන් දුකට කඳුළු හෙළන බව අධ්‍යයනයන් පෙන්වා දී තිබෙනවා.
මනෝජ් රත්නායක
