මෙරට ඉංජිනේරුවන්ගේ තාක්ෂණ දායකත්වයෙන් නිපදවුණු ශ්‍රී ලංකාවේ තෙවැනි නැනෝ චන්ද්‍රිකාව අද දිනයේ ජාත්‍යන්තර අභ්‍යවකාශ නැවතුම්පොළේ සිට කක්ෂයට මුදාහැරීමට නියමිතයි. එය BIRDS-X Dragonfly නම් වනවා. එය ගොඩනඟා ඇත්තේ නවීන තාක්ෂණය පිළිබඳ ආතර් සී. ක්ලාක් ආයතනයේ සහ ජපානයේ කියුශු තාක්ෂණ ආයතනයේ සහයෝගීත්වයෙන්.
මොරටුවේ ආතර් සී. ක්ලාක් ආයතනය සඳහන් කරන පරිදි එය එය පසුගිය අගෝස්තු 24 වැනි දා SpaceX CRS-33 සැපයුම් මෙහෙයුමෙන් ජාත්‍යන්තර අභ්‍යවකාශ නැවතුම්පොළ වෙත ගෙන යනු ලැබ තිබෙනවා.
මෙරට පළමු නැනෝ චන්ද්‍රිකාව ලෙස 2019 වසරේ දී Ravana-1 අභ්‍යවකාශගත කෙරුණු අතර 2022 දී ජාත්‍යන්තර පාර්ශ්වකරුවන් පස් දෙනෙකුගේ සහයෝගිතා මෙහෙයුමක් වශයෙන් KITSUNE නැනෝ චන්ද්‍රිකාව අභ්‍යවකාශ ගතකෙරුණා.
ඒ අනුව ශ්‍රී ලංකාවේ වේලාවෙන් අද පස්වරු 2.15ට පමණ ජාත්‍යන්තර අභ්‍යවකාශ නැවතුම්පොළේ පිහිටි ජපානයට අයත් ‘කිබෝ’ පරීක්ෂණ මොඩියුලයෙන් BIRDS-X Dragonfly සහ තවත් නැනෝ චන්ද්‍රිකා හතරක් (GHS-1, STARS-Me2, RSP-03, Atsushi Space Challenge) කක්ෂය වෙත මුදාහැරීමට නියමිතයි. මෙම අවස්ථාව ජපාන අභ්‍යවකාශ ගවේෂණ නියෝජිතායතනයේ (JAXA) නිල YouTube නාලිකාව ඔස්සේ සජීව ලෙස විකාශය වීමට නියමිතයි.
සෞන්දර්ය සෙනරත්
