පසුගිය ඉරිදා (30) චීනයේ පෞද්ගලික අංශයේ අභ්යවකාශ සමාගමකට අයත් රොකට්ටුවක් අනපේක්ෂිත ලෙස ඉහළට ඇදීයාමෙන් පසු කඩා වැටුණා.
Space Pioneer සමාගම විසින් නිෂ්පාදිත Tianlong-3 රොකට්ටුව මෙලෙස අනතුරට ලක් වූ අතර සමාගම සඳහන් කරන්නේ රොකට්ටුව සහ දියත් කිරීමේ වේදිකාව ඇති සම්බන්ධකයේ වූ ව්යුහාත්මක අකර්මණ්යතාවක් එයට හේතුව වූ බවයි. මෙහි දී රොකට්ටුවේ දියත් කිරීමට සැලසුම් සකස් වී නො තිබූ අතර එහි පළමු අදියරේ එන්ජින්වල ක්රියාකාරිත්වය පරීක්ෂා කරීම සඳහා ‘Static fire’ පරීක්ෂාවක් පමණක් සිදු කිරීමට නියමිත ව පැවතියා.
රොකට්ටුව කඩා වැටුණේ මධ්යම චීනයේ Gongyi නගරයේ පිහිටි දියත් කිරීමේ අංගණයට යාබද කඳුකර වනලැහැබක් මතටයි. මූලික පරීක්ෂණ මඟින් තහවුරු කරගෙන ඇති පරිදි එකදු ජීවිත හානියක් හෝ තුවාල ලැබීමක් වාර්තා වී තිබුණේ නැහැ.
රොකට්ටුවේ සුන්බුන් “ආරක්ෂිත වපසරියක්” තුළ විසිර ගොස් තිබූ බවත්, ගින්නක් ඇති කළ බවත් Gongyiහි හදිසි අවස්ථා කළමනාකරණ බියුරෝව නිවේදනයක් නිකුත් කරමින් සඳහන් කළා. වෙනත් කිසිඳු හානියක් සිදු නො වන පරිද්දෙන් ගින්න මැඩ පැවැත්වීමට හැකි වූ බව ද බියුරෝව සඳහන් කළා.
‘ආකාශ මකරා’ යන අරුත ඇති Tianlong-3 රොකට්ටුව Space Pioneer සමාගමේ පරීක්ෂණ මට්ටමේ පවතින රොකට්ටුවක් වන අතර එය අර්ධ වශයෙන් නැවත භාවිතා කිරීමේ හැකියාව ද පවතිනවා.
The Guardian පෙන්වා දෙන්නේ, දියත් කිරීමෙන් පසු රොකට් සුන්බුන් පතිත වීම චීනය තුළ දුලබ දෙයක් නො වුණත්, පරීක්ෂණ මට්ටමේ පවතින රොකට්ටුවක් සැලසුම් නො කළ පියාසැරියක් සිදු කර කඩා වැටීම විරල සිදු වීමක් බවයි.
The Guardian ඇසුරෙනි.
සෞන්දර්ය සෙනරත්
