නවතම අධ්‍යයනයකින් පෙන්වා දෙන පරිදි ගෝලීය උෂ්ණත්වයේ ඉහළ යාම හේතුවෙන් පෘථිවියේ භූමි කලාප වෙත ඇදහැලෙන වර්ෂාව 75%කින් ඉහළ ගොස් තිබෙනවා. චීන පර්යේෂකයන් පිරිසක් සහ එක්සත් රාජධානියේ කාලගුණ විද්‍යා කාර්යාලය එක් ව සිදු කරන ලද මේ අධ්‍යයනය් වාර්තාව ඉකුත් දා Science ජර්නලයේ පළ වී තිබුණා. මෙහි දී දේශගුණ විපර්යාසය හේතුවෙන් ගෝලීය වර්ෂාපතන රටාවන් ව්‍යාකූල කර ඇති බවට නිරීක්ෂණෘත්මක සාධක මුල් වරට ඉදිරිපත් කරනු ලැබුණා.
දේශගුණ ආකෘතීන් විසින් මේ විචල්‍යය දේශගුණ විපර්යාසයත් සමඟ නරක අතට හැරෙනු ඇති බවට කල් තියා ම පුරෝකථනය කර තිබුණා. නව සොයාගැනීමෙන් පෙනෙන්නට තිබෙන්නේ වර්ෂාපතනයේ අගය පසුගිය වසර 100ක කාලය ඇතුළත නරක අතට හැරෙමින් තිබී ඇති බවයි. ඔස්ට්‍රේලියාව මේ විපර්යාසය වඩාත් තදින් ඉස්මතු කරන භූමි ස්කන්ධයක්.
1900 සිට වර්ෂාපතනයේ ක්‍රමික ඉහළ යාම මේ පර්යේෂණයෙන් සවිස්තරාත්මක ව දැක්වෙනවා. එදිනෙදා ඇද හැළෙන වර්ෂාව සෑම දශකයකට වරක් ගෝලීය වශයෙන් 1.2% කින් ඉහළ ගොස් ඇති බව ඉන් පෙනී යනවා. අධ්‍යයනයට අනුව මේ තත්ත්වය වඩාත් කැපී පෙනෙන ලෙස දැකගත හැකි වන්නේ 1950ට පසු දශකවලයි.
නිසි කලට වැසි වැටීම හොඳ ලක්ෂණයක් වන නමුත්, මෙහි දී වැසි වැටීම වඩාත් ව්‍යාකූල ලෙස සිදු වන බව පෙනෙන්නට තිබෙනවා. උදාහරණයක් ලෙස යම් කිසි ප්‍රදේශයකට වසරක් තුළ දී පතිත විය යුතු වර්ෂාව දින කිහිපයක් තුළ දී ඇද හැළීම සිදු විය හැකියි. එවැනි අවස්ථා ව්‍යසනකාරී ගංවතුර තත්ත්වයන්ට අත වනනවා.
Phys.org ඇසුරෙනි.
සෞන්දර්ය සෙනරත්
