මෑතක දී අභ්යවකාශයෙන් හඳුනාගත් අද්භූත ගුරුත්වාකර්ෂණ තරංග (gravitational-wave) නාදයක්, මීට වසර බිලියන 13කට පෙර විශ්වයේ බිහි වූ ප්රථම අධි ස්කන්ධ කළු කුහරවල ප්රතිරාවයක් විය හැකි බව නවතම පර්යේෂණයකින් හෙළි වී තිබෙනවා. කෝල්ගේට් විශ්වවිද්යාලයේ පර්යේෂකයන් වන සෝහන් ගොඩ්ලා සහ කොස්මින් ඉලී විසින් සිදුකරන ලද මෙම අධ්යයනය ‘Physical Review D’ ජර්නලයේ ප්රකාශයට පත් වුණා. මෙම සොයාගැනීම මඟින් විශ්වයේ ආරම්භක අවධිය සහ අඳුරු පදාර්ථය පිළිබඳව ගවේෂණය කිරීම සඳහා විද්යාඥයින්ට නවතම මාවතක් විවර කර දී තිබෙනවා.
විශ්වය පුරා විසිරී ඇති අතිශය අඩු සංඛ්යාතයකින් යුත් ගුරුත්වාකර්ෂණ තරංග පසුබිමක්, අභ්යවකාශයේ ඉතා නිවැරදි ඔරලෝසු ලෙස ක්රියා කරන පල්සාර් (pulsars) තාරකා ජාලයක් මඟින් විද්යාඥයින් විසින් මෑතකදී හඳුනාගන්නා ලදී. පල්සාර් කාල නිරික්ෂණ ජාල (Pulsar Timing Arrays – PTA) ලෙස හැඳින්වෙන මෙම ක්රමවේදය හරහා හඳුනාගත් මෙම සියුම් තරංග, අතීතයේ සිදු වූ දැවැන්ත කළු කුහර එකිනෙක ගැටීමේ ක්රියාවලියක ප්රතිඵලයක් ලෙස විශ්වාස කෙරෙනවා. කෙසේ වෙතත්, මෙම නවතම පර්යේෂණයෙන් පෙන්වා දෙන්නේ මෙම තරංගවලින් බහුතරයක් මුල් යුගයේ පැවති “අඳුරු තාරකා” වල නටබුන්වලින් පැවත එන කළු කුහර මඟින් ජනනය වී ඇති බවයි.
අඳුරු තාරකා යනු සාමාන්ය තාරකා මෙන් න්යෂ්ටික විලයනයෙන් නොව, අඳුරු පදාර්ථයේ උණුසුම්වීමේ ක්රියාකාරීත්වයෙන් බලගැන්වෙන අතීත විශ්වයේ පැවතුණා යැයි සැලකෙන උපකල්පිත තාරකා විශේෂයක්. පර්යේෂකයන් පෙන්වා දෙන පරිදි, මෙම තාරකා සාමාන්ය තාරකාවලට වඩා දැවැන්ත වන අතර, ඒවා ක්රමයෙන් කඩා වැටීමෙන් සූර්යයා මෙන් දසලක්ෂ ගුණයකටත් වඩා දැවැන්ත සුපිරි කළු කුහර බවට පත්වීමට ඉඩ තිබෙනවා. කාලයත් සමඟ විශ්වය පුරා මෙම කළු කුහර වර්ධනය වී, මන්දාකිනි හරහා ගමන් කර, එකිනෙක යුගල වශයෙන් භ්රමණය වෙමින් ගැටීමේ දී අද වනවිට පල්සාර් ජාල මඟින් නිරීක්ෂණය කරන මෙම ගුරුත්වාකර්ෂණ තරංග නාදය නිර්මාණය වී ඇති බව විශ්වාස කෙරෙනවා.
මෙම අධ්යයනයේ වැදගත්ම නිගමනය වන්නේ වර්තමානයේ අප ලබාගන්නා අභ්යවකාශ තරංග මිනුම් භාවිතා කරමින් අතීත විශ්වයේ පැවති කළු කුහරවල ආරම්භය පිළිබඳව වඩාත් නිවැරදි තොරතුරු අනාවරණය කරගැනීමට හැකි වීමයි. අඳුරු තාරකා යනු හුදෙක් උපකල්පනයක් පමණක් වුවද, ඒවායේ නටබුන් මඟින් නිකුත් කරන ලද ගුරුත්වාකර්ෂණ තරංග අදටත් විශ්වය පුරා ගමන් කරමින් පවතින බව මින් තහවුරු වනවා. තාක්ෂණය දියුණු වීමත් සමඟ පල්සාර් මිනුම් වඩාත් නිවැරදි වන විට, විශ්වයේ පළමු දැවැන්ත කළු කුහර නිර්මාණය වූ ආකාරය සහ අඳුරු පදාර්ථයේ සැබෑ ස්වභාවය පිළිබඳව පවතින අභිරහස් රැසක් නිරාකරණය කරගැනීමට අනාගතයේදී තාරකා විද්යාඥයින්ට හැකිවනු ඇති.
