එක්සත් ජනපදයේ ආහාර හා ඖෂධ පරිපාලන ආයතනය (FDA) විසින් පසුගිය ජනවාරි හය වැනි දා ඇල්සයිමර් රෝගයේ මුල් අවධියේ පසුවන රෝගීන්ගේ සංජානන පරිහානිය මන්දගාමී කෙරෙන නව ඖෂධයකට සිය අනුමැතිය ලබා දී තිබෙනවා.
Lecanemab හෙවත් Legembi නම් මේ ඖෂධයට අනුමැතිය හිමි ව ඇත්තේ කඩිනම් ක්රියාවලියක් හරහා වන අතර ඒ හරහා FDA ආයතනයට හදිසි ඖෂධ අවශ්යතාවන් සහිත බරපතල රෝග තත්ත්වයන් සඳහා අවශ්ය ඖෂධ අනුමත කිරීමේ ක්රියාවලිය වේගවත් කෙරෙනවා.
ජපානයේ Eisai හා Biogen යන සමාගම් විසින් ඒකාබද්ධ ව සංවර්ධනය කරන ලද Legembi සහ තවත් ඇල්සයිමර් ඖෂධයක් වන Aduhelm ඇල්සයිමර් රෝගයට ඵලදායී ව ප්රතිකාර කිරීමේ සටනේ වැදගත් දියුණුවක් නියෝජනය කරන බවයි නිවේදනයක් නිකුත් කරමින් FDA කියා සිටින්නේ.
Legembi සම්බන්ධ සායනික අත්හදාබැලීම්වල මූලික දත්ත පසුගිය සැප්තැම්බර් මාසයේ දී නිකුත් කෙරුණු අතර එය ඇල්සයිමර් රෝගීන්ගේ සංජානන පරිහානිය 27%කින් මන්දගාමී කිරීමට සමත් ව තිබෙනවා. කෙසේ වෙතත් New England Journal of Medicineහි ප්රකාශයට පත්කෙරුණු සම්පූර්ණ පර්යේෂණ දත්තවලින් පෙනී ගොස් ඇත්තේ මේ ඖෂධය ලබාගැනීම මොළයේ අභ්යන්තර ලේ ගැලීම් හා ඉදිමීම්වලට අත වැනීමක් බවයි.
ආසන්න වශයෙන් ඇමෙරිකානුවන් මිලියන 6.5ක් පමණ ඇල්සයිමර් රෝගයෙන් පෙළෙන අතර මතක ශක්තිය නැතිවීම හා මානසික තීව්රතාවය අඩුවීම මෙහි සංලක්ෂණයි.
Science Alert ඇසුරෙනි.
තරුෂි කෞෂානි
