වසර 3,200ක් පැරැණි ඊජිප්තු ඊජිප්තු ශිෂ්ටාචාරයට අයත් ව තිබූ හමුදා බැරැක්ක කිහිපයක නෂ්ටාවශේෂ හෙළි කර ගැනීමට එරට පුරාවිද්‍යාඥයන් සමත් ව සිටිනවා. ඒ අතර තිබී හමු වූ වටිනා පුරාවස්තු අතර රැමසීස් II ලෙස රූපාක්ෂරවලින් නම සටහන් කර ඇති අසිපතක් ද වනවා.
විද්‍යාඥයන් සඳහන් කරන පරිදි ගොඩනැඟිලි ව්‍යුහයේ ඇතැම් තැන්වල ධාන්‍ය ගබඩා කර ගැනීම සඳහා භාවිත කළ ස්ටෝරු කාමර සහ කෑම පිසීම සඳහා භාවිත කළ උදුන් ද පිහිටා තිබූ බව දැකගත හැකියි. මත්ස්‍යයන්ගේ සහ වෙනත් සතුන්ගේ අස්ථි කොටස් අඩංගු ව තිබූ මැටි බඳුන්වල නෂ්ටාවශේෂ ද මෙහි දී සොයාගනු ලැබ තිබෙනවා. මේ ඉදි කිරීමට යාබද තැනක ගවයන්ගේ ඇටසැකිලි ද වළ දා තිබිය දී සොයා ගෙන තිබෙනවා. ඊජිප්තුවේ සංචාරක සහ පුරාවිද්‍යා අමාත්‍යාංශයේ මෙහෙයවීම යටතේ මෙහි කැණීම් කටයුතු සඳහා නායකත්වය සපයා දී තිබුණේ පුරාවිද්‍යාඥ Ahmed El Kharadly.
මේ අතර බැරැක්ක තුළ තිබිය දී ඉපැරැණි අවිආයුධවල නෂ්ටාවශේෂ සොයා ගැනීමට ද පුරාවිද්‍යාඥයන් සමත් වී තිබුණා. ඒ අතර ක්‍රිස්තු පූර්ව 1279 සිට 1213 දක්වා ඊජිප්තුව පාලනය කළ දෙවැනි රැමසීස් (Ramesses II) රජුගේ නම රූපාක්ෂරවලින් කොයා ඇති ලෝකඩ අසිපතක් ද වනවා. එය ප්‍රමාණයෙන් කුඩා කුටියක තිබිය දී සොයාගැනුණු අතර El Kharadly පෙන්වා දෙන්නේ එය සටන් කිරීම සඳහා සූදානම් කොට තිබූවක් මිස හුදු ප්‍රදර්ශන භාණ්ඩයක් ලෙස තබා තිබූවක් නො විය හැකි බව ය.
Live Science ඇසුරෙනි.
සෞන්දර්ය සෙනරත්
